O Proxecto
O cinema é unha fonte de transmisión de valores de diferente índole :culturais, sociais, educativos e emocionais. É un medio a través do cal facer chegar ás crianzas distintas mensaxes dunha maneira doada e accesible converténdose, á vez que se emprega como fórmula de entretemento, nunha ferramenta fundamental de cara ao desenvolvemento do seu espírito crítico e da empatía.
Con respecto á música, esta é practicamente indispensable nas nosas vidas. É un medio de expresión universal que ten numerosos efectos positivos no ser humano, especialmente durante os seus primeiros anos. Desde que nacemos, afecta ao noso cerebro e, durante os primeiros pasos na vida, axuda ao noso desenvolvemento cognitivo, social, motor, emocional e da linguaxe.
A proposta é unha fusión de ambas artes e a presentación das mesmas de maneira lúdica e divertida empregando a fórmula de festival para que cativas e cativos de todas as idades poidan desfrutar de varias xornadas de festa. Facer máis accesible a cultura ás máis pequenas e pequenos é un dos obxectivos fundamentais desta proposta, de aí que o programa oficial do Festival conte cun apartado específico de proxeccións para escolares dos diversos centros da Vila.
O lugar seleccionado para realizar este festival de cinema e música infantil é o Concello de Soutomaior. Desde un primeiro momento o seu equipo de goberno amosou interese pola iniciativa e facilitou os medios precisos para executar a idea.
Música e Cinema
